เพลงกล่อมเด็ก
ตัวอย่างเพลงกล่อมเด็กประจำภาคอีสาน
บทที่ ๒๘
เออ…เฮอะ…เออ…เฮอะ…เออ…เฮอะ…เออ
นอนซะหล่าหลับตาแม่สิกล่อม นอนอู่แก้งหลับแล้วแมสิไกว
นอนอู้ไทยไกวไปโต้นเต้น โต้นตี่เต้นบักม่วงหัวเงน
เอาไปเพลเจ้าหัวบ่ออยาก เอาไปฝากเจ้าน้อยลักกิน
หมาอีนิลรักกินข้าวหม่า เต้นเข่าป่าเห็นไข่นกเจนเว้น
เจนเว้นเอ้ยเห็นควายกูบ่อ เห็นบ่อแพ้จักแม่นควายไผ
จูงควายไปกะไปเฮียงตอหมี่ เต้นขึ้นขี่อีเก้งสักเเอว
เสียงแซวๆ เขาไปจับอึ่ง อึ่งบ่ฮ่องงาข่องกะบ่ไป
บทที่ ๒๙
นอนซะแมเยอหลับตาซะแมเยอ เจ้านอนอู่แก้วหลับแล้วแมสิไกว
แมไปไฮสิปิ่งไก่มาหา แมไปนาสิปิ่งปลามาป้อน
แม่สิไปเลี่ยงม่อนอยู่ในป่าสวนม่อน นอนซะแมเยอหลับตาซะแมเยอ
ไผบ่อนอนแมบ่อให้กินจู่ ไผบ่อฮู่แมบ่อให้กินนม
ไผบ่อนอนแมวโพงกัดแก้ม ไผบ่อแอ่มไก่น้อยตอนตา
นอนซะแมเยอหลับตาซะแมเยอ แมวโพงเป่าอยู่ในสวนฮ่องมาว
ฝั่นเชือกคาวมาค่องคอแมว นอนซะแมเยอหลับตาซะแมเยอ
บทที่ ๓๐
เออ…เฮอะ…เออ…เฮอะ…เออ…เฮะ…เออ
นอนวะหล่าหลับตาแมสิกล่อมนอนอิ่มแล้ว จั่งคอยตื่นกินนมกินนมไผกะบ่อคือนมแม กินนมแมมันแซบมันหวานนอนโดนโดน แมสิไปเฮ้ดเวียก เฮ็ดเวียกแล้วจั่งตื่นมาหา เออ…เฮอะ…เออ…เฮอะ…เออ…เฮะ…เออ
เออ…เฮอะ…เออ…เฮอะ…เออ…เฮะ…เออ
นอนสาหล่าหลับตาแมสิกล่อม นอนสาหล่าหลับตาแมสิกล่อม ออ…เฮอะ…เออ…เฮอะ…เออ…เฮะ…เออ
เออ…เฮอะ…เออ…เฮอะ…เออ…เฮะ…เออ
พ่อเจ้าเพินไปเฮ็ดงานแมอยู่บ้านเลี่ยงเจ้าคอนคำ เลี่ยงง่ายง่าย ใหญ่ไวไวเด้อลูกหล่า (ซ้ำ) บัดพ่อกลับมาเพินสิได้ดีใจ
นอนสาหล่าหลับตาแมสิกล่อม
เออ…เฮอะ…เออ…เฮอะ…เออ…เฮะ…เออ
เออ…เฮอะ…เออ…เฮอะ…เออ…เฮะ…เออ
บทที่ ๓๑
เอ่อเอ้อ…นอนเด้อหล่าหลับตาแมสิกล่อม
นอนอู่แก้วนอนแล้วแมสิไกว เอ่อเอ้อ
แมไปไฮกะจี่ไก่มาหา แมไปนากะจี่ปลามาป้อน
แม่เลี้ยงหม่อนกะอยู่ป่าสวนมอญ
สาดบ่หมอนกะหัวซอนกอหญ้า
ผ่าขาวม้ากะปูแล้วละนอน ทางหัวแม่นมดลิ้น
ทางตีนแม่นมดงาม ทั้งสองสีข้างกะแม่นมดลิ้นไฟ
เอ่อเอ้อ…เอ่อเอ้อ
บทที่ ๓๒
นอนสาหล่าหลับตาแมสิกล่อม แมไปไฮหมกไข่ไก่มาหา
แมไปนาหมกไข่ปลามามาป้อน แมเลี้ยงมอญในป่าสวนมอญ
นอนตะแคงอยู่กกไม้เนิ่น ฟังเสียงเอิ่นแม่นบ่าวสีลา
สาวสุดตากะมาเอิ้นข่อย ข่อยผู้น้อยกะแอ่วกินนม
อื้อ ฮึ อือ ฮึ อื้อ ฮึ อือ
บทที่ ๓๓
อื่อ ฮือ อื่อ ฮือ อื่อ ฮือ อื่อ โอ่นซาไหมไกวไปตลิ่ง
เก็บดอกไม้สองกิ่งบูชา เจ้าหัวมาแล้วเอาสาดมาปู
เอาคันญูกับโถนมาตั้ง น้ำเต้าตั้งขันหมากมาเฮียง
เพิ่นสีเทียนอาชญาองค์หล่อ เพิ่นก่อไม้ไว้เฮ็ดเฮียน
คนตาเบียนอย่าเอาเป็นหมู่ นอนอยู่อู่หลับตาสาเด้อ
บทที่ ๓๔
อื่อ ฮึ อือ ฮึ อื่อ ฮึ อือ เจ้าบ่นอนแมวโพงกัดแก้ม
เจ้าบ่แย้มไก่น้อยตอดตา แมเลี้ยงม่อนเข่าป่าสวนมอญ
เดิ๊กออนซอนหมั่นลุกหมั่นตื่น ลูกฮ้องไห่งมไต้กะบอง
มือแมโจมเอาลูกใส่อู่ อุ้มลูกน้อยมาไห่กินนม
เสียงทมทมขี่เยี่ยวไส่แม เลี้ยงลูกน้อยมันยากมันซา
พออยากลาลูกผัวไปบวช สร้างผนวชในศาสนา
เจ้าใหญ่มาอย่าลืมคุณแม แม่นแมหญิงให้เจ้าไปไหว้
แม่นพ่อชายให้เจ้าไปบวช ไห้ยิ่งยวดในศีลในธรรม
ให้จำนำบุญคุณพ่อแม พอได้แก่ดึงขึ้นสวรรค์
บทที่ ๓๕
อือ อื้อ นอนสาหล่าขุนทึงลูกแม อย่าได้ฮ่องอำไห่ในป่าแดนดง
ฝูงเสือฮ้ายลางคืนมันเที่ยว มันซิขบแจ่มเจ้าบาท้าวให้เล่านอน
นอนสาหล่าสายตาตาลุกมิ่ง แมคนิงบ่แล้วน้ำตาย้อยย่าวลง
นอนสาหล่าหลับตาอู่สานปอ นอนกะทอยาฮ้องสมโตบ่มีพ่อ
นอนตูบต่อเล่าสมเจ้าสมเจ้าพ่อบ่มี นอนส่หล่าขุนทึงลูกแม
อย่าได้มัวแอ่วอ้อนแล้วอย่าแอ่ววอน นอนสาหล่าหลับนอนป่าดงดอน
นอนในเขาในไพรปานชะนีนางไม้ นอนสาหล่านอนอู่แพรลาย
เจ้าหากเป็นชายโทนพ่อบ่มีมาเลี้ยง นอนหลับแล้วอย่าแอ่วกลางป่า
เสือสิขบคาบเคี้ยวบาท้าวให้เล่านอน เดิกค่อนๆ กาเวาเค้าอ่าน
กาเวาวอนพ่องฮ้องนางน้องฮ่ำไฮ